Молитвы и слвословия

Феодоровской-Костромской

Иконе Богородици и сщмч. Ипатию

Икона Божией Матери Феодоровская

Одигитрия Русских Царей

ТРОПАРИ 1 и 2

Пришествием честныя Твоей иконы, Богоотроковице,/ обрадованный днесь Богохранимый град Кострома,/ якоже древний Израиль к кивоту Завета,/ притекает ко изображению лица Твоего/и воплотившагося от Тебе Бога нашего,/ да Твоим Матерним к Нему предстательством/ присно ходатайствуеши всем,/ под сень крова Твоего прибегающим,/ мир и велию милость.

 

Днесь светло красуется преименитый град Кострома/ и вся Русская страна,/ созывающи к веселию вся боголюбивыя народы христианския,/ на преславное торжество Божия Матере,/ пришествия ради чудотворнаго Ея и многоцелебнаго образа,/ днесь бо явися нам пресветлое великое солнце,/ приидите, вси Богоизбраннии людие, новый Израиль,/ ко источнику цельбоносному,/ источает бо нам неоскудныя милости Пресвятая Богородица/ и избавляет вся грады и страны христианския/ невредимы от всех навет вражиих./ Но, о Всемилостивая Госпоже, Дево Богородице, Владычице,/ спаси страну нашу, и архиереи, и вся люди Твоего достояния от всех бед/ по велицей Твоей милости, да зовем Ти:/ радуйся, Дево, христианом похвало.

 

КОНДАК 1 и 2

Благодарственная приносяще Ти, раби Твои, Богородительнице, о всех,/ имиже благодеяла еси граду нашему,/ из глубины души взываем к Тебе и мили ся деем:/ не престани, Владычице,/ Матерними к Сыну Твоему и Богу нашему молитвами/ подавати вся благая и спасительная всем,/ верою и любовию вопиющим Ти:/ радуйся, Дево, христиан похвало.

 

Притецем, людие, вси к тихому и доброму пристанищу,/ в дом Божия Матере,/ чудному образу Царицы и Богородицы,/ за неизреченную милость Ея явленному,/ верно припадающе и вопиюще:/ о Всемилостивая Владычице,/ за спасительное Твое смотрение,/ чуднаго образа к нам пришествие,/ посети нас, грешных, светло сотворяющих празднество Твое,/ укрепи страну нашу,/ дивно на враги победу подающи, и веру утверди./ Церковь Сына Твоего непоколебиму соблюди,/ притекающих к Тебе спаси, от всяких напастей избави,/ сохраняющи в мире все Православие, да зовем Ти:/ радуйся, Невесто Неневестная.

МОЛИТВА 1

О Премилосердая Госпоже, Царице, Богородице, приими смиренное моление наше, и не отрини нас, заступление и прибежище наше, и не возгнушайся нас, недостойных, но, яко Милосердая, не престани молящи, Егоже родила еси, да дарует нам прощение многих согрешений наших, да спасет нас, имиже весть судьбами. Помилуй нас, Владычице, помилуй нас, несмь бо нам спасение от дел.

 

Темже верно вопием Ти: помилуй рабы Твоя и неплодное сердце наше покажи плодоносно благих дел. Призри на нас, недостойных, Ты бо упование и покров наш, жизнь и свет сердцу нашему. Яко Невечерний Свет от чрева Твоего воздвигшая, озари душу нашу, Чистая, и отжени всяку мглу сердца нашего. Даруй нам умиление, покаяние и сокрушение сердечное. Сподоби нас по вся дни живота нашего творити волю Сына Твоего и Бога нашего и во всем благоугождати Ему Единому.

 

О Богомати, не престани молящи Рождшагося от Тебе за вся, притекающия с верою к сему чудотворному образу Твоему, и подавай им скорую помощь и утешение в скорбех и напастех и злостраданиих, избави их от клеветы и злобы человеческия, от враг видимых и невидимых и всякия нужды и печали. Спаси отечество наше, град сей и вся грады и страны от всяких бед и нужд и сотвори милостива нам быти Бога нашего, отврати всякий гнев Его, на ны движимый, и избави ны от належащаго и праведнаго Его прещения. О Боголюбивая Владычице, Ангелов украшение, мучеников славо и всех святых радосте, с ними моли Господа, да сподобит нас в покаянии скончати живота нашего течение.

 

В смерти же час, Пресвятая Дево, избави нас от власти бесовския и осуждения, и ответа, и страшнаго испытания, и мытарств горьких, и огня вечнаго, да, сподобльшеся славнаго Царствия Божия, величаем Тя и славим воплощшагося от Тебе Христа, Бога нашего, Емуже слава со Отцем и Святым Духом, ныне, и присно, и во веки веков. Аминь.

МОЛИТВА 2

О Пресвятая Владычице Богородице и Приснодево Марие, единая надеждо нам грешным! К Тебе прибегаем и Тебе молим, яко велие имаши дерзновение пред рождшимся от Тебе по плоти Господом Богом и Спасителем нашим Иисусом Христом. Не презри слез наших, не возгнушайся воздыханий наших, не отрини скорби нашея, не посрами упования нашего на Тя, но матерними молении Твоими умоли Господа Бога, да сподобит нас, грешных и недостойных, свободитися от грехов и страстей душевных и телесных, умрети миру и жити Ему Единому по вся дни живота нашего.

 

О Пресвятая Владычице Богородице, путешествующим спутешествуй и ограждай, и охраняй оныя, избави плененных от пленения, свободи страждущих от бед, утеши сущих в печали, скорбех и напастех, облегчи нищету и всяко злострадание телесное и даруй всем вся потребная к животу, благочестию и жизни временней. Спаси, Владычице, вся страны и грады и сей град, имже сия чудотворная и святая икона Твоя дадеся во утешение и ограждение, избави я от глада, губительства, труса, потопа, огня, меча, нашествия иноплеменных, междоусобныя брани и отврати всякий гнев, на ны праведно движимый.

 

Даруй нам время на покаяние и обращение, избави нас от внезапныя смерти и во время исхода нашего предстани нам, явльшися, Дево Богородице, и избави нас от воздушных мытарств князей века сего, сподоби на страшнем Судищи Христове стати одесную и соделай нас наследники вечных благ, да славим во веки великолепое Имя Сына Твоего и Бога нашего, со Безначальным Его Отцем и Святым, и Благим, и Животворящим Его Духом, ныне, и присно, и во веки веков. Аминь.

ФЕОДОРОВСКОЙ

ПОСВЯЩАЕТСЯ

 

Солнце!

Китеж Златоглавый –

вечный, царственный, один!

Наша сила, наша слава,

наших далей Господин!

 

Явленная в Китеж Граде

Светлых Витязей Отцу,

в Володимирской ограде

Невского вела к венцу.

 

Сколько битв благословила!

Сколько  сказочных побед

и чудес Руси явила,

прославляя на весь свет.

 

Вывела из смертной сечи,

когда жёг Батый до тла,

от Ордынского бесчестья

Русь к свободе привела.

 

Звонница Заволжских далей!

Заповедная Краса!

Православия Скрижали!

Демиургов голоса!

 

Царь – вершина Отчей славы,

со смиреньем припадал,

во спасение Державы.

Лик слезами обливал.

 

Русский Китеж Златоглавый,

вечный, царственный, один!

Наша сила, наша слава,

поднимайся из глубин!

 

Русь как прежде осияешь

светлым ликом – за бедой.

И – прозреем! И подаришь

миру Китеж Золотой.

 

Равноапостольный сщмч. Ипатий,

Епископ Гангрский, чудотворец (†326).

В его честь в 1330 г. основан Ипатьевский монастырь в Костроме,

на месте явления Божией Матери с Апостолом Филиппом и сщмч. Ипатием.

ТРОПАРЬ

Изволением Божественнаго разума/ вперив ум свой в Небесныя обители/ и равно Ангелом житие пожив на земли,/ сего ради мучения красоты венец на своем версе утвердив,/ священномучениче Ипатие,/ моли Христа Бога/ спастися душам нашим.

 

ИН ТРОПАРЬ

В прекрасном Церкве апостольския вертограде/ из юна возраста всесильною десницею Божиею насадился еси,/ Богоблаженне отче Ипатие,/ и в ней, яко верен первосвященник,/ верно Богоначальное и Всетворящее Троическое Единство/ проповедал еси во Вселенском Собрании,/ Духа же Святаго в добродетелех исполнен быв,/ велия чудеса сотворив,/ мучением за веру Христову скончався,/ пришёл еси в Небесный град,/ идеже Триипостаснаго Бога зря,/ моли о чествующих тя,/ да в Горнем Иерусалиме со святыми жити сподобимся.

 

ИН ТРОПАРЬ

Боговидное досточудных добродетелей зерцало,/ Богоправимое Православный веры правило/ и утверждение Церкве Христовы,/ за нюже и страдал еси, всечудне отче Ипатие,/ чудесы, Богодарованными тебе, весь мир удивив,/ душеспасительныя пользы сотворил еси,/ и ныне верно призывающим тя во всяких бедах и напастех/ испроси нам у Господа Бога/ помощь и спасение вечное душам.

 

КОНДАК

Римскому отечеству светильник,/ Богозарными лучами концы светя,/ ныне просвети твое празднество поющия, Ипатие,/ прося свыше мира и грехов оставления,/ молитвами защити ны, Ипатие многострадально.

 

ИН КОНДАК

Обитель Триипостаснаго Божества,/ достоблаженне отче Ипатие, быв,/ во вселенную Всетворца Бога воскликнул еси./ Благодарственне же чудодействуя,/ вшел еси в Небесный обители,/ тамо моли Всесвятую Троицу, молим тя,/ исцелити телеса и души наша/ в Богосозданную нашу красоту.

 

ИН КОНДАК

О всеблаженный чудотворче Ипатие,/ предстояй в Небесех Всетворящей Божественней Троице,/ с лики Горними богоприятне и всерадостне возносиши хвалы./ Приими от нас сие тебе хвалорадостнословие./ И моли Господа избавити ны от всяких грехов, напастей же и болезней/ и даровати Царствие Небесное всюду поющим:/ аллилуйя.

 

МОЛИТВА

благодарственная святому равноапостольному сщмч. Ипатию

Трисолнечнаго Света светозарная звездо, вводящая в мир Трисолнечный Свет апостольскими твоими, Богоевангельскаго проповедания священноучении, священномучениче, иерарше Христов, Богоблаженне Ипатие. Ты приял еси от Святыя Троицы равноапостольную благодать, серафимскую в горечестии * к Богу любовь, якоже верховнейший апостолов Петр, и херувимскую многоочитую во учении премудрость, якоже вторый Павел. Просветивый премудрым твоим благочестия учением тьмочисленныя народы, присноусердно подражая всемернаго Учителя, Господа Бога и Спаса нашего Иисуса Христа.

 

Егоже ради всесмиренно молю богоподражательное отеческое твое благоутробие: призри милостивно богосветлыма твоима на сущее недостоинство мое, яко всечадолюбивый по Бозе отец, и присноусердный нашего спасения наставник, и всех в Горних правонеизменный строитель, адамантная Православию стена и пресветлый столп, вводящий второноваго Израиля во всепресветлейший Горний Сион. Потщися вскоре помоществовати на бранех воинству нашему. Проси же присно у Святыя Троицы всем православным христианом мира и тишины, душевнаго спасения и многолетняго в телеси здравия, воздуха благорастворения, земли благоплодие, неплодствующим благочадие, и в законе Господнем воспитания, и всех благих умножения.

 

А после жития коемуждо жизни сея сподоби святыми твоими молитвами улучити христианскую кончину благу, непостыдну и мирну, со всепредобрейшим исповеданием и со причастием Святых Безсмертных Небесных и Животворящих Христовых Таин, и с молитвомаслием* безпрепятное воздушных мытарств прешествие, наследие со святыми всерадостныя присносущныя жизни, в нейже купно со Ангельскими чинми непрестанныя хвалы вознесем Безначальному Отцу со Единородным Его Сыном и с Пресвятым, Благим и Животворящим Его Духом, и тебе, великое твое отеческое милостивое заступление, ныне, и присно, и во веки веков. Аминь.

 

 

 

LUCH 2020