Царя царей Царственная Избраннице.

            

 

Акафист Царственной Великомученице Екатерине.

Кондак 1

Избранную и венчанную Деву мученицу, Невесту Христову Екатерину, похвальными песньми воспоим, яко преславную мучителя Победительницу и премудрую философов Наставницу: ты же дивная во святых Екатерино, Ангелов Божиих радование и сил Бесплотных изумление, приклонися милостивне благопотребным прошениям зовущих ти:

Радуйся, Святая Великомученице Екатерино, Царя царей Царственная Избраннице!

 

Икос 1

Ангелом равную чистоту имущи, Дево Екатерино, со Ангелы Божественнаго озарения сподобилася еси, с ними же воспевающи Трисвятую песнь, услыши нас, поющих тебе на земли сия:

 

Радуйся, честное святыни жилище;

радуйся, чудное знамение сбывшагося на тебе Божия Промысла.

Радуйся, благоволения Отча сосуде;

радуйся, страданий Христовых исполнение.

Радуйся, чистое Духа Святаго обиталище;

радуйся, светом Благочестия просветившаяся.

Радуйся, святою купелию отрожденная;

радуйся, ризы Кровию Агнца омывшая

Радуйся, святая Великомученице Екатерине, Царя царей Царственная Избраннице!

 

Кондак 2

Видящи Екатерина себе видения сподобшеся, тече к святому старцу, икону ей Богоматере прежде того вручившему, и поведа ему, како отвращаше лице Свое ей явивыйся с Пречистою Своею Материею Христос, како безумну и нищу и худородну ю нарек, дондеже не оставит идольскаго нечестия. Преподобный же, слышав сия, настави ю в таинствах веры и крести ю. Она же во обновлении духа благодарно пояше Богу: Аллилуйа!

 

Икос 2

Разум благий, благородство истинное, богатство негиблющее стяжавши в духовном отрождении святая Екатерина достойна явися Небеснаго Жениха Христа, Иже, паки явився ей, возлюби ю и дарованным перстнем в невесту Себе обручи. Она же, познавши такое к ней благоволение Божие, тако уязвися любовию Его, яко не мудрствоваше более о земных вещах, но о Возлюбленном своём непрестанно мысляше. Таковой благодати сподобльшаяся слыши от нас:

 

Радуйся, мира низости возненавидевшая;

радуйся, в воню мира Христова текущая.

Радуйся, добрая любительнице Жениха Безсмертнаго;

радуйся, сокровище благоволения Вышняго.

Радуйся, Деннице Света Небеснаго;

радуйся, луна совершенная.

Радуйся, Маслина, в Дому Божии насажденная,

радуйся, кедр Ливанский заоблачне.

Радуйся, Святая Великомученице Екатерино, Царя царей царственная Избраннице!

 

Кондак 3

Сила Вышняго даде тогда святей Екатерине дерзновение, еже нечествующаго царя Максимина о принесении идолом жертв обличити небоязненно, и той пребысть безгласен на мног час, не могий противитися ея глаголам. Она же, благодарящи Бога, воспеваше: Аллилуйа!

 

Икос 3

Имущи святая Екатерина свыше данную премудрость, егда нечестивый царь, постави пред собою, вопрошаше ю о роде ея и сане, исповеда себе быти дщерь царскую, философския и риторския науки добре изучившую, паче же Христову Невесту себе наименова, в явное отвержение идольскаго служения, мы же дивящеся такому дерзновению о Господе, славославим тя ситце:

 

Радуйся, убо, Екатерине преславная;

радуйся, царское священие.

Радуйся, пчело, дыма идольскаго отлетевшая;

радуйся, голубице, златы крила имущая.

Радуйся, кадило Христова благоухания.

радуйся, труба духа, воспевшая глас истиннаго Богословия.

Радуйся, доброе веры исповедание;

радуйся, света евангельскаго сияние.

Радуйся, Святая Великомученице Екатерино, Царя царей Царственная Избраннице!

 

Кондак 4

Бурею ярости вознеистовився царь на святую Деву, рече к ней: «Не глаголи зле о бозех наших». Екатерина отвеща: «Аще восхощеши отрясти мрак прелести уразумееши богов твоих худость и познаеши Истиннаго Бога, Его же Имя токмо глаголемое, или Крест, изобразуемый на воздусе, прогоняет боги твоя и погубляет. И аще повелиши, явлю те Истину, поющи Богу: Аллилуиа».

 

Икос 4

Слышав нечестивый царь свободный и мудрый ответ твой о вере Христовой, убоявся, да не будет побежден от тебе, собра от пределов державы своея мудрецов, числом пятдесят, на прение. Ты же, Архангелом Михаилом утвержденная и о победе уверенная, возрадовалася еси вступити в прение с ними. Приими убо, дево, от нас похвалу сию:

 

Радуйся, изъявительнице ума Христова;

радуйся, херувимское стяжавшая Богопознание.

Радуйся, серафимскою воспаленная к Богу любовию;

радуйся, мудрых мудрейшая.

Радуйся, духовный меч на неверие изострившая;

радуйся нечестия прогонительнице.

Радуйся верных Христу наставнице.

радуйся, наша помощнице.

Радуйся, Святая Великомученице Екатерино, Царя царей Царственная Избраннице!

 

Кондак 5

Боготечной звезде была еси подобна, Екатерино, препревши пятдесят ветий и наставивши их на путь христианский, ведущий к праведному Солнцу, от Девы возсиявшему Христу Богу, своими мудрыми глаголы, иже и осуждени бывше за Христа на сожжение и напутствовани молитвою твоею, с радостию идоша в огнь, поюще: Аллилуйа!

 

Икос 5

Видев царюющий повеления своя в тебе пренебреженны и увещания презренны, обратися к лукавству, еже ласканием прельстити тя, обещая полцарства тебе дати. Ты же веру сокровищам земным предпочетши и Жениха Христа возлюбивши паче земнаго царства и одежду мученичества паче багряницы, отвергла еси его суесловие. Сего ради восписуем ти сия похвальная:

 

Радуйся, Дево, лесть обличившая;

радуйся, запинателя змия поправшая.

Радуйся, Дщерь Избранная;

радуйся, дево, рясны златыми одеянная.

Радуйся, всякое вещество превозшедшая;

радуйся, на гору боговидения востекшая.

Радуйся, светом богопознания просвещенная;

Радуйся, законов вечных хранительнице;

Радуйся, Святая Великомученице Екатерино, Царя царей Царственная Избраннице!

 

Кондак 6

Проповедником Богоносным, Апостолом поревновавши, дерзновенно пред лицем мучителя проповедала еси Христа, истиннаго Бога, Емуже в ранах и в темнице пела еси: Аллилуйа!

 

Икос 6

Возсиявый в сердце твоем свет истиннаго Богоразумия отгнал есть мрак скорбей, иже не остави тя алкати, голубицею пищу ти посылая, ниже стужати о болезни, посетил бо Сам тя в темнице, ободряя и многи венцы обещавая. Ты же, терпеливодушная, сим паче укрепилася еси и царицу Августу и воеводу Порфириа, с воины притекших к тебе, обратила еси к свету веры Христовой и научила, пети тебе сия:

 

Радуйся, мироположнице Божественныя любве;

радуйся, адаманте крепкий.

Радуйся, вина чудес неизреченных;

радуйся, врага терпением убившая.

Радуйся, язвы Господа на теле своем носившая;

радуйся, царице Августы к Подвигу путенаставнице.

Радуйся, яко во тьме свет была еси;

радуйся, яко Господь, Свет мира, тебе явился

Радуйся, Святая Великомученице Екатерино, Царя царей Царственная Избраннице!

 

Кондак 7

Хотящу безбожному царю привести тя к мерзкому идолослужению, паки сети подстилает тебе, премудрая, еже уловити тя лестно похвалою красоты твоея; ты же красоту вещь привременну и скоропреходну именовала еси, Христа же исповедала еси Бога жива и истинна и пела ему: Аллилуйа!

 

Икос 7

Новую показа царь ярость и безчеловечие, повелев епарху колесами растерзати девственное, чистое и святое тело твое, но чудесно рукою Ангела абие разрешена была еси безвредна и колеса на части сокрушены, имиже многи от неверных убиены, яко удивися сам царь и предстоящий народ, иже и взываше: «Велик Бог христианский». Мы же, чудящеся сему, взываем тебе:

 

Радуйся, мученице, Ангелом честная и говейная;

радуйся, слава полков страдальческих.

Радуйся, светлая на враги победа;

радуйся, страх неверных.

Радуйся, сосуде множайшия силы Божия;

Радуйся, радование верных.

радуйся, болезнующих скорая целебнице.

Радуйся, помощнице нашего Спасения.

Радуйся, Святая Великомученице Екатерино, Царя царей Царственная Избраннице!

 

Кондак 8

Странное славы изменение и за Христа страдание царицы и воеводы с воины видевше, устранимся любве мира и плоти и вперим себе к разумению Бога, Сей бо есть красота, и слава, и венец нам, поющим: Аллилуйа!

 

Икос 8

Весь сладость, весь желание тебе, святая Екатерино, бысть Иисус: сладце бо Его ради горькия муки терпела еси и скипетр, предлагаемый тебе, попрала еси, предзрящи будущее воздаяние. От нас же приими похвальная сия:

 

Радуйся, чистая, чисте Чистаго возлюбившая;

радуйся, горлица, Краснаго Жениха в пустыне дольнаго мира вожделевшая.

Радуйся, воню риз Его благоухавшая;

радуйся, яко серна на горах ароматских искавшая Рожденнаго прежде холмов вечных.

Радуйся, подвиг страдальческий ради любве Христовы совершившая;

радуйся, лик мученический Богу приведшая.

Радуйся, яко ветии тобою получиша Царство Небесное;

радуйся, яко тоеже тобою получити чаем.

Радуйся, Святая Великомученице Екатерино, Царя царей Царственная Избраннице!

 

Кондак 9

Все естество ангельское возрадовася радостию, зря тя, Екатерино, победивши миродержца, шествующую к премирным яко победоносную воеводу, в последовании полка страдальческаго, и воспе победная, взывая: Аллилуйа!

 

Икос 9

Ветия многовещанныя заустишася: не возмогше бо противовещати богодухновенным словесем твоим, молчанием почитают дарования твоя; мы же, немощнии, како можем отверсти уста на хвалы твоя? Однако дерзаем и молим, сподоби, благая, безбедно принести тебе песнь сию:

 

Радуйся, органе Духа Святаго;

радуйся, заре Его всю Землю осиявшая.

Радуйся, догматов Божественных пучина;

радуйся, Премудрость, препревшая философов.

Радуйся, Купино Неопалимая веры Христовой;

радуйся, плетения ветий растерзавшая.

Радуйся, пленицы греховныя разрешающая.

Радуйся, уз греха скорая решительнице;

Радуйся, Святая Великомученице Екатерино, Царя царей Царственная Избраннице!

 

Кондак 10

Спасти хотящи душу твою, о теле твоем нерадила еси, Екатерино, и на мечное усечение, мучителю давшу на то изречение, ты радостно потекла еси, поющи Святому Безсмертному: Аллилуиа.

 

Икос 10

Стена тверда и непреодолима явилася еси женам, тебе на место усечения провождаюшим и с рыданием тя жестокосерду к себе и безразсудну быти именующим: яко не пощадила еси сладкаго живота в цвете юности, яко презрела еси земное предлагаемое царство и блаженство. Ты же воспретила еси неполезный плач их и суесловие, текущи скорейше соединитися чрез смерть со своим Возлюбленным, того ради слышиши:

 

Радуйся, радостно главу свою приклонившая;

радуйся, до конца претерпевшая.

Радуйся, течение добре скончавшая;

радуйся, яко с пуим не совратилася еси.

Радуйся, яко пламень любве неугасимь соблюдшая;

радуйся, мучеников красото.

радуйся, Чаше, черплющая радость.

Радуйся, крепкое христиан прибежище.

Радуйся, Святая Великомученице Екатерино, Царя царей Царственная Избраннице!

 

Кондак 11

Пение похвальное дерзнухом принести тебе, но оскудевает слово наше и недоумевает ум, како глаголати; обаче слово твое премудрое, многих похитившее от невежества и идолонечестия, возставляет нас. Даждь нам слово твое, во еже пети удивльшему на тебе величия Своя Богу: Аллилуйа!

 

Икос 11

Светоприемную тя свещу, мечным усечением погашенную, но на свещнице Святыя Троицы явленную Ангелы видеше и получив повеление, девственное тело твое на горе Синайстей погребоша, да не видимо будет, якоже сама хотела еси, врагом Господним. Мы же песнь сию возсылаем ти:

              

Радуйся, солнцеобразная дево, на Небеса духом возшедшая;

радуйся, Сиона Горняго достигшая.

Радуйся, венче доброты в руце Господни;

Радуйся, к скинии нерукотворенней, вечней приближившаяся;

радуйся, на горе законней почивающая телом.

Радуйся, яко тамо видена быша шествия Бога Синаина, Бога Иаковля;

радуйся, места боговидения Моисеова одержание.

Радуйся, ревности Илиины указание;

Радуйся, Святая Великомученице Екатерино, Царя царей Царственная Избраннице.

 

Кондак 12

Благодать дана тебе от Бога руководствовати к познанию истины Его, в тайне сокровенней, и даяти всем яже к пользе прошения. Темже мы, помраченнии, умиленно просим тя, мудрая дево: просвети умныя наши очи и положи нам к Небеси стезю проходну, да поем с тобою ныне и во вся веки Единому Премудрому: Аллилуиа.

 

Икос 12

Поюще крепкия твоя мученическия подвиги, хвалим тя, яко одушевленный сосуд спасения человеков: твоим бо разумом Бог премудрость премудрых века сего погуби; тобою ветий призва в язык свят, в люди обновления, яко тем страдати за Христа. Просвети и нас, благая Дево, помраченных, да зовем ти:

            

Радуйся, зерцало Божия Премудрости;

радуйся, силою Вышняго одеянная.

Радуйся, подвижнице, елеем радования умащенная;

радуйся, воеводо, полки Богу приведшая

Радуйся, во светлости святыя вшедшая;

Раднйся, венцем Небеснаго Царствия увенчанная;

радуйся, Престолу Творца предстоятельнице.

радуйся, сладость доброты Его вкушающая.

Радуйся, Святая Великомученице Екатерино, Царя царей Царственная Избраннице!

 

Кондак 13

О святая великомученице, Царственная Мученице Екатерино! Приими сие похвальное пение и избави нас от враг видимых и невидимых и от вечнаго мучения твоим благоприятным ходатайством сохрани, да с тобою присно поем Богу: Аллилуиа.

(Этот кондак читается трижды, затем икос 1 и кондак 1)

Молитвы Царственной Великомуч. Екатерине.

Молитва первая.

О святая Екатерино, дево и мученице истинная Христова Невесто! Молим тя чрез особливую благодать, еюже предвари тя Жених твой, Сладчайший Иисус: якоже посрамивши прелести мучителя, мудростию твоею пятдесят ветий победила еси и, напоивши их Небесным учением, к свету истинныя веры наставила еси, тако испроси и нам оную Божию мудрость, да и мы, расторгнувше вся козни адскаго мучителя и презрев мира и плоти соблазны, достойны явимся Божественныя славы и к разширению святыя нашея православныя веры сосуды достойны соделаемся, и с тобою в Небесной скинии Господа и Владыку нашего Иисуса Христа хвалим и прославляем во вся веки. Аминь.

 

Молитва вторая.

О святая дево и мученице Екатерине! Молим тя: призри на бедствия нас, грешных раб Божиих (имена), сотвори нас горняя мудрствовати, а не земная. Поспеши нам молитвами твоими побеждати плотская похотения, к миру пристрастие и козни злых духов, на нас злобно воюющих; да твоим предстательством во дни жития сего свободни явимся от враждебных их нападений и по исходе от воздушных их истязаний. О премудрая дево! Даруй нам вся яже к пользе прошения, можеши бо многая испросити у Возлюбленнаго Жениха твоего, Христа Бога нашего. Мы вемы, яко много может молитва праведнаго, поспешествуемая благостию Милосердаго Бога, Емуже слава, честь и благодарение всегда, ныне и присно и во веки веков.

 

Молитва третья.

О, святая великомученице Екатерино, избранный чистоты сосуде, столпе православия, надежная предстательнице наша, явившая нам сама вину умоляти тя, подвижнице законная, святая на святей горе свято почивающая! Молим тя: приникши свыше, вонми гласу моления нашего, призри на бедствие рабов твоих, просвети омрачение ума нашего, сотвори нас горняя мудрствовати, а не земная. Поспеши нам молитвами твоими побеждати плотская похотения, пристрастия к миру и козни злых духов, на нас злобно воюющих: да твоим предста-тельством во дни жития сего свободни будем от враждебных их нападений и по исходе от воздушных их истязаний. О, премудрая дево! Даруй нам вся, яже к пользе прошения: можеши бо многая испросити у возлюбленнаго Жениха, Христа Бога нашего. Мы вемы, яко много может молитва праведнаго, поспешествуемая благоутробием милосердаго Бога, Емуже слава, честь и благодарение всегда, ныне и присно и во веки веков. Аминь.

 

Тропарь вкмч. Екатерине

Тропарь, глас 4

Добродетельми, яко лучами солнечными, просветила еси неверныя мудрецы: и якоже пресветлая луна ходящим в нощи, неверия тьму отгнала еси, и царицу уверила еси, вкупе же и мучителя обличила еси, Богозванная Невесто, блаженная Екатерино: желанием востекла еси в Небесный чертог, к прекрасному Жениху Христу, и от Него царским венцем венчалася еси: Емуже со Ангелы предстоящи, за ны молися, творящия пречестную память твою.

 

 

 

 

 

LUCH 2009